نئچه سطیرده علیرضا فرشی ایله بیز(1)

سـیرا داغـلار قـوینونـدا، بابــک قــالاسینا دوغــــرو

علیرضا بی توتوقلو اولورکن، میلی حرکتده بیرگه یاشادیغیمیز بیر سیرا خاطیره لری دوستلارلا پایلاشیب، اونو ایسه یاد ائدجه یم.
دومان میرمحمدیانی
ایلک گؤروشوموز 1382جی ایلین، حماسه تؤره دیجی تیر آی نین 11ینده اولدو. تهراندان بابک قالاسینا یولا دوشه جکدیک، هامی یافت آبادین مدائن مئیدانینا توپلاشیب، بیر اوتوبوسلا قالایا دوغرو یولا دوشدوک. چوخ سئوینجی لی بیر گون ایدی، بذ داغلارینین باشینداکی قارتال یوواسینا توپلاشماغا اولدوقجا هوسلی ایدیک. رحمتلیک کاظیم موسوی ساعاتلارلا بیزه ناغارا چالیب ماهنی اوخودو، چوخلاری سس سسه وئریب بیرلیکده میللی ماهنیلار اوخودولار. یول سرعتله آرخادا قالیردی، بؤیوکلریمیزدن ده بیر نئچه سی اؤن سیرا دا اوتورموشدولار، دانیشیب، تانیشییب، ماهنی اوخویوب یولا داوام ائتدیک. گئجه یاریسی زنجاندا اوز وئرن تصادف بیر آز بیزی یوباتسادا، صاباح ساعات 13ده اؤزوموز کلیبره یئتیرمه نی باشاردیق. آما آرتیق شهرین گیریشینده کی پولیس دوراغیندان کئچمک اوقدر ده راحات دئییلدی.
بیر نئچه پلیس ماشینا چیخیب، هریانی گزیب، دئشیب، م.ص. بیزیمله گلمه لی دی! آتیلا کیشی زاده کیمدی، اؤزو گلسین آشاغا، سیعد موغانلی بو ماشیندا؟ سن ماهنی زنگانلی سان؟ و بوکیمی سواللار، تارتیشمالار ساعاتلارجا سوردو، پلیس باشچیسی بیزی تبریزه قایتارماق امرین وئردی، بیز دیرندیک، اوزون ساچلارینی آرخادان باغلایان گنج؛ من بوردان بیر آدیم گئری یه قویمارام دئییه دیرندی(سونرالار تانیشدیغیم علیرضا بی)، نئچه مامور اونو توتوب ایچری چکمک ایسته دی بیزلر ایسه اونلارلا تارتیشدیق، چکیش بکیش اوزاندی، بیر نئچه ساعات گئچدی، قالایا گلن لرین بیر سیراسینین بیزی تانیماسی و دایانماسی اورتالیغی شولوقلاشدیرمیشدیر، گونلیک گوجلری ایسه بودورومو سئومیردیلر، آما بیزیم قالایا گئتمه گیمیزی ده انگللمک ایسته ییردیلر. علیرضا بی دوسلارین بیر نئچه سی ایله کسه یولدان داغلاری آشما قرارینا گلدیلر، یول چوخ اوزون و قورخولو ایدی، آما بو اینامین قاباغیندا کسین یئنیله جک ایدی. اونلار یولا دوشدولر مئشه لیک داغدان قالایا دوغرو، بیزه ایسه ماشیندا وسایل گئترمک و ماشینی قالایا نئجه اولسادا یئتیرمه گؤروی دوشدو. ساعاتلار دیرشمه دن سونرا نهایت بیزده یولا دوشوب قالایا چاتدیق. هریان آداملا دولو و بوتون یئرلر توتولموشدی، بو یاشیما قدر بوقدر اینسان بیر یئرده گؤرمه میشدیم. گؤز ایشله دیکجه آدام ایدی، آددیم باشی تانیش و یولداش ایدی، چوخ صمیمی و ایستی بیر دوروم ایدی، هامی بیر-بیرین بی، بایان، باجی، قارداش سسله ییب آذربایجانلی لیق صداقت و انسان سئورلیگین سرگیسی گؤسترگه سی ایدی.......
گئجه ساعات 12 ایدی، بیزه هله اوتوز نفر اوتورابیله جک بیر یئر تاپا بیلمه میشدیک، بیر قوروپ میللتچی دوستلار بیزی گؤروب، یئر آچیب بیزی ده اؤز اورتالارینا آلدیلار، آما هله داغ یولوندان پیاده گلمیش دوستلاردان هئچ خبر یوخ ایدی، تلفن لار کسیلمیشدی، اونلاردان خبر آلماق بوقدر جمعیت ایچنده اولدوقجا چتین اولموشدو، هریانی گزیب آختاردیق، 9 نفردن آرتیق بو قروپون قالا اتگینه یئتیشمه لری صوب ساعات 4ده قدر سورموشدو، دوستلارین بیری اونلاری بیزه یئتردی، هله 5 یاشی تاماملانمامیش حسنا آدلی قیز باشلارینا گلنی فیلم سانیب، بونون فیلمنه هاچان باخاجاییق دئیردی. ساعات 5ی ایشله ییردی، هامی دوستلارلا بیرداها بیر آرایا گلیب، تَزَجه یوخلاییب یورقونلوغوموز آلیردیق کی او اینسان قالابالیغینین سسی اوجالدی، قالایا دوغرو یوروشون های کوی لری سانکی بابکین آذربایجانا یئنی چاغریش امری ایدی.....